"The Shaman Teaches The Women Magic" by Jessie Oonark
ᖃᕆᑕᐅᔭᒃᑯᑦ ᑕᕐᕆᔭᖅᑎᓪᓗᑎᑦ ᑕᑯᔪᓐᓇᕐᓂᐊᖅᐳᑎᑦ ᐃᓄᖕᓂᒃ ᐃᓐᓇᕐᓂᒃ, ᓴᓇᓐᖑᐊᖅᑎᓂᒃ ᐊᒻᒪ ᓄᓇᓕᖕᓂ ᓯᕗᓕᖅᑎᐅᔪᓂᒃ, ᑖᒃᑯᑎᒎᓇᖅ, ᐃᓕᓐᓂᐊᕐᓗᑎᑦ ᐃᓄᐃᑦ ᐊᓐᓂᕆᔭᖏᓐᓂᒃ ᐊᒻᒪ ᐃᓱᒪᒋᔭᖏᓐᓂᒃ, ᐱᐅᓯᖏᓐᓂᒃ ᐊᒻᒪ ᐱᓕᕆᔾᔪᓯᖏᓐᓂᒃ. ᐅᒥᐊᕐᔪᐊᒃᑯᑦ ᐊᐅᓪᓚᕐᓯᓚᕐᓗᑎᑦ ᐃᖃᓗᖕᓂᑦ ᑭᓐᖓᕐᓄᑦ, ᓄᓇᕗᒥ ᑕᓪᓕᒪᓂᒃ ᑕᑯᔭᒃᓴᖃᕐᓂᐊᖅᐳᑎᑦ ᑲᔾᔮᕐᓇᖅᑐᓂᒃ:
- ᐊᕙᑎᒥᒃ ᐸᖅᑭᒡᓯᕐᓂᖅ ᐳᓪᓚᒃᑕᔫᒧᑦ ᐅᒥᐊᒃᑰᕐᓗᑎᑦ Savage Islands ᕿᑭᖅᑕᖏᑎᒍᑦ ᐱᖃᑎᖃᕐᓗᑎᑦ ᐃᓄᖕᒥᒃ ᐊᖑᓇᓱᒃᑎᒥᒃ ᐊᒻᒪ ᓂᕐᔪᑎᓂᒃ ᖃᐅᔨᓴᐃᓂᕐᒧᑦ ᐃᓕᓴᕐᔨᒥᒃ ᖃᓪᓗᓈᑦ ᓄᓇᖓᓂᓐᖔᕐᓯᒪᔪᒥᒃ;
- ᒪᓕᒐᓕᕆᓂᖅ , ᐊᒡᓱᕈᕐᓇᖅᑐᒥᒃ ᐃᓱᒪᓕᐅᕈᑎᒃᓴᒥᒃ ᓵᓐᖓᒃᓯᕐᓗᑎᑦ ᐅᐸᒍᑎᑎᓪᓗᑎᑦ ᐃᑦᑕᕐᓂᕐᓴᕐᒧᑦ ᓄᓇᒋᔭᕕᓂᕐᒧᑦ Digges Island ᕿᑭᖅᑕᖓᓄᑦ;
- ᐊᖏᖃᑎᒌᖕᓂᒃᑯᑦ ᐃᓱᒪᓕᐅᕐᓂᖅ , ᐃᕝᕕᑦ ᐊᓯᑎᓪᓗ ᐅᒥᐊᕐᔪᐊᕐᒦᖃᑎᑎᑦ ᐊᒃᓱᕈᕐᓇᖅᑐᒧᑦ ᑎᑭᑕᐅᓪᓗᓯ ᐆᒪᒐᓱᐊᒡᒐᕐᓇᖅᑐᒧᑦ Pritzler Harbour ᕿᑭᖅᑕᖓᓂ, ᐃᓱᒪᓕᐅᕆᐊᖃᕐᓂᐊᖅᑎᓪᓗᓯ ᓂᕈᐊᕐᓯᓗᓯ ᖃᓄᐃᓕᐅᕆᐊᖃᕐᒪᖔᑦᓯ ᐊᒻᒪ ᑭᓱᓕᕆᔭᕆᐊᖃᕐᒪᖔᑦᓯ;
- ᐃᓕᓐᓂᐊᕐᓂᖅ ᐱᓕᕆᓂᒃᑯᑦ , ᖃᐃᖅᑯᔭᐅᒍᕕᑦ ᑐᐱᐅᑉ ᐃᓗᐊᓅᖁᔭᐅᓗᑎᑦ ᑐᓐᖓᓱᒃᑎᑕᐅᓂᐊᖅᐳᑎᑦ ᑭᖕᒥᕈᕐᒥᐅᓂᑦ, ᑖᒃᑯᐊ ᑕᑯᒃᓴᐅᑎᑦᓯᓂᐊᖅᑐᑦ ᐱᓕᕆᔪᓐᓇᕐᓂᕆᔭᖏᓐᓂᒃ, ᐊᒻᒪ ᐊᓐᓇᐅᒪᔾᔪᑎᓂᒃ ᓴᓇᑎᓪᓗᒋᑦ ᓄᓇᒥ ᐊᑐᖅᑕᐅᔪᓐᓇᖅᑐᓂᒃ;
- ᓄᓇᓕᐅᔪᖅ ᒪᑭᒪᔾᔪᑎᖃᖅᑐᖅ , ᑕᑯᓂᐊᖅᐸᑦ ᑭᓐᖓᕐᒥᐅᑦ ᓄᓇᓕᖓᑦ ᐃᔨᖏᑎᒍᑦ ᖃᐅᔨᒪᔭᐅᒻᒪᕆᒃᑐᑦ ᑎᑎᕋᐅᔭᖅᑎᑦ ᐃᓄᐃᑦ, ᐱᖃᓯᐅᑎᓪᓗᒋᑦ ᕿᓐᓄᐊᔪᐊᖅ ᐊᓯᕙ ᐊᒻᒪ ᑲᓈᖏᓐᓈᖅ ᐳᑐᒍᖅ, ᐊᒻᒪ ᒪᒃᑯᒃᑐᑦ ᐃᓄᐃᑦ ᓴᓇᓐᖑᐊᖅᑎᑦ ᓄᓇᕐᔪᐊᕐᒧᑦ ᖃᐅᔨᒪᔭᐅᓕᖅᐸᓪᓕᐊᔪᑦ, ᐱᖃᓯᐅᑎᓪᓗᒍ ᓯᐊᓯ ᑭᐊᓈᓕ ᐊᒻᒪ ᐊᓂ ᐳᑐᒍᖅ.
ᓇᓚᒎᖅᐳᖅ ᐃᓄᐃᑦ ᖃᐅᔨᒪᔭᑐᖃᖏᑦ ᑐᑭᖃᕐᒥᖕᒪᑕ ᓯᓚᑐᓂᕐᒥᒃ, ᑖᒃᑯᐊ ᐃᓐᓇᑐᖃᐅᔪᑦ ᐊᒻᒪ ᐊᓯᖏᑦ ᐅᓂᒃᑳᖅᑐᑦ ᖃᐅᔨᒪᓂᓪᓚᕆᖕᒥᖕᓂᒃ ᐃᑎᔪᒥᓐᖔᖅᑐᒥᒃ ᐅᓂᒃᑲᐅᓯᖃᕐᓂᐊᕐᒪᑕ ᐃᓕᖕᓄᑦ, ᓄᐊᑕᐅᓯᒪᔪᓂᒃ ᐊᕐᕌᒍᒐᓴᖕᓄᑦ. ᓇᒥᑐᐃᓐᓇᖅ ᓄᓇᖃᕋᓗᐊᕈᕕᑦ, ᑖᓐᓇᖃᐅᔨᒪᓂᐅᔪᖅ ᐃᓕᖕᓂᒃ ᐃᑲᔪᕐᓯᔪᓐᓇᕐᓂᐊᖅᑐᖅ ᐊᒡᓱᒍᕐᓇᖅᑐᓂᒃ ᓵᓐᖓᒃᓯᑎᓪᓗᑎᑦ ᐊᒻᒪ ᐱᕕᒃᓴᕆᔭᑎᑦ ᑎᒍᕙᒡᓗᒋᑦ ᐃᓅᓯᕆᔭᕐᓂ. ᑖᓐᓇ ᖃᐅᔨᓇᓱᖃᕈᑎᐅᔪᖅ ᖁᕕᐊᓇᖅᑐᖅ, ᐃᓛᓐᓂᒃᑯᑦ ᐊᒡᓱᕈᕐᓇᕐᓂᖅᓴᐅᓕᖃᑦᑕᖅᑐᑦ. ᐱᔭᕆᖅᐸᓪᓕᐊᓗᒍ ᑖᓐᓇ ᖃᐅᔨᓴᕐᓂᕆᔭᐃᑦ, ᐊᒻᒪ ᖃᕆᑕᐅᔭᒃᑯᑦ ᐱᓐᖑᐊᖃᑦᑕᕐᓗᑎᑦ ᑕᕐᕆᔭᒐᐅᑉ ᐃᓗᐊᓂ, ᐱᔭᕇᕐᓯᔾᔪᓯᐊᖃᑦᑕᕐᓂᐊᖅᑐᑎᑦ ᐅᔭᕋᖕᒥᒃ ᓇᖕᒥᓂᖅ ᐃᓄᒃᓱᓕᐅᕈᑎᒋᓂᐊᖅᑕᕐᓂᒃ, ᐅᑭᐅᖅᑕᖅᑐᕐᒦᑦᑐᑦ ᐃᓄᒃᓱᑦ ᐊᔾᔨᖏᓐᓂᒃ ᐃᓄᖕᓄᑦ ᑖᒃᑯᐊ ᑕᒻᒪᕇᒃᑯᑎᒋᔭᐅᕙᐅᖅᑐᑦ ᐊᕐᕌᒍᒐᓴᒡᔪᐊᓄᑦ. ᐃᓄᒃᓱᖁᑎᒋᔭᐃᑦ ᓇᓗᓇᐃᒃᑯᑕᕆᓂᐊᖅᑕᐃᑦ ᐱᓕᕆᔪᓐᓇᑦᓯᐊᕐᓂᕐᓄᑦ, ᐃᓱᐊᓂ ᑕᕐᕆᔭᒐᐅᑉ, ᐊᑐᕈᓐᓇᕐᓯᓂᐊᖅᑐᑎᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐊᓯᐅᔾᔭᐃᒃᑯᑎᒋᓗᒍ ᐃᓅᓯᔭᕆᔭᕐᓂ ᐃᓅᑎᓪᓗᑎᑦ.
ᐃᓚᖏᑦ ᐃᓱᒪᖃᖅᐳᑦ ᐃᓄᐃᑦ ᓯᕗᓪᓕᖅᐹᖑᓪᓗᑎᒃ ᐊᕙᑎᒥᒃ ᐸᖅᑭᒡᖠᔨᐅᓂᖏᓐᓂᒃ. ᑖᒃᑯᐊ ᐃᓄᐃᑦ ᖃᐅᔨᒪᔭᑐᖃᖏᑎᒍᑦ ᖃᐅᔨᒐᓱᐊᕐᓂᖅ ᐊᐅᓪᓚᕐᓯᒪᓗᑎᒃ ᐱᕕᒃᓴᖃᖅᑎᑦᓯᕗᑦ ᐃᓕᓐᓂᐊᕈᓐᓴᕐᓂᕐᒥᒃ ᖃᓄᖅ ᑖᒃᑯᐊ 'ᐸᖅᑭᒡᖠᔨᐅᔪᑦ ᓄᓇᒥᒃ' , ᐱᓕᕆᓂᕆᔭᖓᑦ ᐃᓄᐃᑦ ᑲᒪᑦᓯᐊᕐᓯᒪᓂᖃᕐᒪᑕ ᑲᓇ ᖕᓇᖓᓂᕐᒥᐅᑦ ᐅᑭᐅᖅᑕᖅᑐᑦ ᐊᕐᕌᒍᒐᓴᒡᔪᐊᓄᑦ. ᑖᒃᑯᐊ ᓇᓗᓇᐃᒃᑯᑕᐅᓪᓗᑎᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐊᒃᑐᐃᓂᖓᓄᓪᓗ ᓯᓚᐅᑦ ᐅᖅᑰᓯᕙᓪᓕᐊᓂᖓᓄᑦ ᑖᒃᑯᐊ ᐃᓄᖕᓄᑦ ᐊᒻᒪ ᖃᐅᔨᓴᖅᑎᒻᒪᕆᐅᔪᓄᑦ ᐅᔾᔨᕆᔭᐅᖃᑦᑕᕐᓯᒪᓕᖅᑐᑦ ᐊᒻᒪ ᑎᑎᕋᖅᑕᐅᖃᑦᑕᕐᓯᒪᓕᖅᑐᑦ ᐊᕐᕌᒍᒐᓴᖕᓄᑦ, ᒫᓐᓇᐅᓕᖅᑐᖅ ᑐᐊᕕᕐᓇᖅᓯᔪᖅ ᐃᓘᓐᓇᑕ ᓄᓇᕐᔪᐊᒥᐅᑎᒋᑦ ᓄᓇᕐᔪᐊᕐᒥᒃ ᐸᖅᑭᒡᖠᔨᐅᔭᕆᐊᖃᓕᕐᓂᑦᑎᓐᓂᒃ.