Kyra Fisher 2

ᐱᖃᓐᓇᕆᔭᖃᕋᒪ ᔭᓗᓇᐃᕝᒥᐅᑕᕐᒥᑦ, ᐃᒡᓗᓕᖕᒥᐅᑕᒃᓴᔭᖅ, ᔨᐅᕆᒪ ᐊᓇᑐᔭᖅ. ᐅᖃᐅᑎᓚᐅᖅᓯᒪᔮᖓ ᒥᑭᔫᓪᓗᓂᒎᖅ ᐊᓈᓇᖓᑕ ᐅᖃᐅᑎᓚᐅᖅᓯᒪᔭᖓ ᖃᓄᖅ ᒥᖅᓱᕆᐊᖃᕆᐊᒃᓴᖅ. ᐊᒻᒪᓗ ᑕᐃᒪᐃᒋᐊᖃᖅᑰᕐᒪᑦ ᐱᔾᔪᑎᓪᓗᒍ ᐃᓄᐃᑦ ᐃᓕᖅᑯᓯᖏᑦ ᐱᓗᐊᖅᑐᒥᒃ ᓯᐊᕈᑐᖃᖅ ᐊᖑᓇᓱᒍᓐᓇᕐᓗᑎᐅᒋᐊᖃᓚᐅᕐᒪᑕ ᖃᓄᐃᑦᑑᒐᓗᐊᖅᐸᑦ ᓯᓚ, ᑲᒥᑐᐃᓐᓈᖕᓂᑦ ᑲᒥᒃᑯᕕᑦ, ᑲᒫᓗᖕᓂᓪᓗᓐᓂᑦ, ᐳᐊᓗᖕᓂᓪᓗᓐᓂᑦ ᒥᑦᓱᖅᓯᐊᑦᓯᒪᔪᒻᒪᕆᐅᒋᐊᖃᓚᐅᕐᒪᑕ. ᐱᔾᔪᑎᒋᓪᓗᒍ ᑭᓗᐃᔭᖅᐸᑕ ᖁᐊᕈᓐᓇᖅᑐᑎᑦ, ᑕᐃᒪᐃᒻᒪᑦ ᐊᔪᕿᖅᓲᔾᔭᐅᖃᑦᑕᓚᐅᖅᑐᑦ ᒥᖅᓱᑦᓯᐊᕈᔭᐅᓪᓗᑎᒃ ᐃᖕᒥᓂᒃ ᓴᐳᑎᓯᒪᖁᓪᓗᒋᑦ, ᖃᑕᓐᖑᑎᓂᓗ. ᐊᔭᖓᒎᖅ ᒥᖅᓱᑦᓯᐊᖅᑎᐅᓗᐊᕐᓂᖏᒻᒪᑦ ᐊᒻᒪᓗ ᐊᓈᓇᖓᑕ ᐅᖃᐅᑏᓐᓇᖃᑦᑕᓚᐅᖅᑕᖓ “ᒥᖅᓱᖃᑦᑕᖏᓪᓗᑎᑦ ᐊᔭᒃᑎᑐᑦ.” ᐊᒻᒪᓗ ᓯᐊᓯ ᐱᑦᓯᐊᖅᓯᒪᔪᓂᒃ ᑭᓯᐊᓂ ᓴᓇᒍᒪᖕᒥᔪᖅ. ᐊᒥᓱᓗᐊᓂᒃ ᓴᓇᕙᓐᖏᑦᑑᒐᓗᐊᖅ ᐱᔾᔪᑎᒋᓪᓗᒍ ᐊᑯᓂᐊᓗᒃ ᑎᑎᖅᑐᒐᖅᐸᖕᒪᑦ. ᐊᒻᒪᓗ ᑕᒪᓐᓇ ᓴᖅᑭᓯᒪᖅᑰᖅᑐᖅ ᒥᖅᓱᑦᓯᐊᕐᓂᐊᕐᕈᕕᑦ ᐊᓐᓄᕌᓂᒃ, ᐊᑯᑦᑐᔫᒋᐊᖃᓐᖏᑦᑐᑦ, ᖃᓂᒌᒃᑐᑯᓗᒋᐊᖃᖅᑐᑦ, ᐃᒻᒪᒃᑕᕐᓂᐊᖏᒻᒪᑕ.

ᓄᓇᓕᖕᓂ ᓂᐲᑦ