ᐃᓄᐃᑦ ᖃᐅᔨᒪᔭᑐᖃᖏᑦ, ᓄᓇᑐᐃᓐᓇᕐᓂ ᓄᓇᖃᖅᑎᓪᓗᑕ, ᐃᓱᒪᒋᑐᐃᓐᓇᖅᑐᒍ ᓄᓇᖃᕐᓂᖅ ᓄᓇᑐᐃᓐᓇᕐᒥ ᖁᕕᐊᒋᔭᕋ ᐊᒻᒪᓗ ᓯᑯ ᐊᐅᒃᐸᓪᓕᐊᓕᖅᑎᓪᓗᒍ ᐊᐱᓐᖔᕈᖅᐸᓪᓕᐊᑎᓪᓗᒍ, ᖃᓄᐃᑦᑐᑐᐃᓐᓇᕐᓂᖅ ᓴᓇᕐᕈᑎᓂᒃ ᐊᑐᕆᐊᖃᖅᑕᒃᑲᓂᒃ ᐊᑐᖃᑦᑕᖅᑐᖓ. ᑕᒪᑐᒪ ᓄᓇᕐᔪᐊᑉ ᐅᖃᐅᑎᖕᒪᖓ ᓂᐱᓐᓇᖅᑐᖃᕐᒪ ᓇᒥᑭᐊᖅ ᐊᒻᒪᓗ ᐃᓚᖓ ᐅᖁᒪᐃᓐᓂᖃᖅᑐᒻᒪᕆᐅᓪᓗᓂ ᐊᒻᒪᓗ ᐃᓱᒻᒥᕈᑎᒋᓚᐅᖅᓯᒪᒐᒃᑯ ᖃᓄᖅ ᐱᓕᕆᐊᕆᔪᓐᓇᕐᒪᖔᒃᑭᑦ ᑎᑭᒍᓐᓇᖏᑕᒃᑲ, ᓲᕐᓗ ᐊᑐᕐᓂᖅ ᖃᓄᐃᑦᑐᓂᒃ ᐅᔭᖅᑲᓂᒃ ᐅᖁᒪᐃᓗᐊᓐᖏᑦᑐᓂᒃ. ᐃᓱᒪᒋᔭᖃᓕᕌᖓᒪ ᖃᓄᐃᓕᐅᕆᐊᒃᓴᖅ ᖃᐃᔨᒪᑦᓯᐊᖃᑦᑕᖅᑐᖓ ᐊᒻᒪᓗ ᑕᐃᒪᐃᒻᒪᑦ ᑲᔪᓯᑦᓯᐊᕈᓐᓇᖃᑦᑕᖅᑐᖓ. ᐃᓚᖓᒍᑦ, ᐃᖃᓪᓕᐊᓚᐅᖅᓯᒪᒐᒪ ᐊᒻᒪᓗ ᐅᐃᒐ ᑲᖑᖅᓯᐅᕆᐊᖅᑐᓂ ᐊᒻᒪᓗ ᑲᖑᖅᑕᓂ ᑎᒍᒍᓐᓇᓚᐅᓐᖏᒻᒪᒍ, ᐅᖓᓯᓗᐊᕌᓗᓐᖏᑦᑐᖅ, ᖃᓄᕐᓗ ᐱᓂᐊᕆᐊᒃᓴᖅ ᓇᓗᒋᓪᓗᓂᐅᒃ, ᕿᔪᓕᔭᕋᓂᓗ, ᑭᓯᐊᓂ ᐊᒃᑐᓈᒥᒃ. ᐊᐱᕆᓪᓗᓂᖓ ᐅᖁᒪᐃᓐᓂᖅᐹᒥᒃ, ᐅᕿᓐᓂᖅᐹᒥᓪᓗ, ᐳᒃᑕᒍᓐᓇᖅᑐᒥ ᓱᓗᑎᑐᑦ. ᐃᓱᒪᒋᓚᐅᖅᑐᒍ, ᐅᐃᒐ ᖃᐃᓪᓗᓂ. ᖃᐃᒐᓱᐊᓚᐅᖅᑐᖅ ᐃᑲᕐᕋᐅᑉ ᐊᕝᕙᖓᓂᒃ ᐱᔾᔪᑎᒋᓪᓗᒍ ᐊᓯᐊᓂᓚᐅᕐᒪᑦ, ᑕᓯᕐᒦᑎᓪᓗᖓ. ᖃᐃᓪᓗᓂ ᐊᒻᒪᓗ ᐊᐱᕆᓪᓗᓂ ᖃᓄᖅ ᐃᑭᑦᓯᓂᐊᕐᒪᖔᑦ. ᑕᑭᔪᒥᒃ ᐊᒃᑐᓈᖃᕋᑦᑕ, ᐊᒻᒪᓗ ᑖᓐᓇ ᐊᒃᑐᓈᖅ ᐅᖓᓯᖕᓂᖃᖅᑐᓂ ᐅᖓᑖᓄᑦ 100 ᔮᑦ. ᐊᒃᑐᓈᖅ ᐱᓪᓗᑎᒍ ᐊᒻᒪᓗ ᕿᓂᖅᑐᖓ ᐅᔭᕋᖕᓂᑦ ᐊᑕᐅᓯᕐᒥᒃ ᐅᔭᕋᖕᒥᑦ, ᒪᕐᕉᖕᓂᑦ ᐅᔭᕌᖕᓂᑦ, ᐱᖓᓱᓂᒃ ᐅᔭᖅᑲᓂᒃ, ᐅᖁᒪᐃᓐᓂᖏᑦ ᑐᖔᓂᑦᑐᑦ 1 ᐸᐅᓐ, ᐊᕝᕙᓪᓗᐊᖓᖃᐃ ᐅᖁᒪᐃᓐᓂᖓᑕ. ᕿᓚᒡᕕᒋᓪᓗᒍ ᐅᔭᕋᒃ ᐅᖁᒪᐃᓐᓂᖃᖅᑐᖃᐃ 1 ᐸᐅᓐᒥᒃ, ᐅᐃᔾᔮᖅᑎᓕᖅᑐᒍ ᐅᔭᕋᒃ, ᕿᓚᑦᓯᐊᖅᑐᒍ ᐲᕐᓂᐊᖏᒻᒪᑦ ᖃᓱᖁᓇᒍ. ᓱᑲᖓᑎᑦᓯᐊᓚᐅᖅᑕᕋ ᐊᒻᒪᓗ ᑲᖑᑦ ᓯᑯᒦᑦᑐᓂ, ᐅᐃᒪ ᐅᖃᐅᑎᓪᓗᓂᖓ, ᑕᒪᓐᓇ ᓇᑭᑦ ᐃᓕᓐᓂᕋᕕᐅᒃ? ᐅᕙᓐᓂᒃ, ᐋᖅᑭᒃᓱᕋᒃᑯ. ᖃᓄᖅ ᑕᒪᑐᒥᖓ ᖃᐅᔨᒪᒐᕕᑦ? ᐅᖃᖅᑐᖓ ᐅᖁᒪᐃᓐᓂᖅᑕᖃᕐᒪᑦ, ᐅᕿᓐᓂᖅᑕᖃᖅᑐᓂᓗ ᐊᒻᒪᓗ ᑕᒪᓐᓇ ᓇᓕᒧᒌᒃᑎᒋᐊᖃᕐᒪᑦ, ᖃᓄᐃᓕᐅᕆᐊᒃᓴᖅ ᖃᐅᔨᒪᓐᖏᑐᐃᓐᓇᕆᐊᖃᕋᕕᑦ. ᐱᓗᐊᖅᑐᒥᒃ ᓄᓇᒥ. ᖃᓄᖅᑑᕆᐊᖃᕐᒪᑦ ᓄᓇᒥ, ᐃᓱᒪᒃᓴᖅᓯᐅᕐᓗᓂ ᐱᔾᔪᑎᒋᓪᓗᒍ ᐃᓱᒪ ᐃᓱᒪᐅᖕᒪᑦ, ᐊᑐᕆᐊᓕᒃ. ᐊᒻᒪᓗ ᐃᓱᒪᒍᑎᑐᐃᓐᓴᐅᖏᒻᒪᑦ, ᑕᑯᒍᓐᓇᖅᑐᑎᑦ ᑭᓱᓕᒫᓂᒃ, ᑐᓵᔪᓐᓇᖅᑐᑎᑦ ᑭᓱᓕᒫᓂᒃ, ᓇᐃᒪᒍᓐᓇᖅᑐᑎᑦ ᑭᓱᓕᒫᓂᒃ. ᑕᒪᓐᓇ ᐅᖁᒪᐃᓐᓂᐅᖕᒪᑦ ᑕᐃᒪᐃᒻᒪᑦ, ᑲᐃᕙᑎᓚᐅᖅᑕᕋ ᐊᒃᓱᓈᖅ ᐊᒻᒪ ᐅᖓᓯᒋᐊᖅᑐᒍ ᐅᐃᒐᓂᒃ, ᐊᕙᓚᑲᓪᓚᒍᒪᓐᖏᒧᑦ, ᖃᓱᒍᒃᑯ ᐊᕙᓗᔭᐅᓂᐅᓴᑐᐃᓐᓇᕐᒪᑦ, ᐅᖓᓯᒡᓕᒋᐊᖅᑐᖓ ᑲᐃᕙᑏᓐᓇᖅᑐᒍ ᐃᒋᒃᑲᒃᑯ ᐱᓪᓗᐊᓚᐅᖅᑕᕋ. ᓄᓱᑳᓪᓚᖕᓂᐊᖅᑲᐅᖏᑕᕋ ᐱᔾᔪᑎᒋᓪᓗᒍ ᑖᓐᓇ ᐅᔭᕋᒃ ᑭᕕᑐᐃᓐᓇᕆᐊᖃᕐᒪᑦ ᐊᒻᒪᓗ ᑕᒪᓐᓇ ᓯᑯ ᓱᕋᒃᑎᕐᓗᓂ, ᓱᕋᒃᑎᓴᕋᐃᒻᒪᑦ, ᓄᑖᖑᓗᐊᒧᑦ, ᐅᐱᓐᖔᕈᖅᐸᓪᓕᐊᓕᖅᑐᖅ, ᐊᐅᔭᕈᖅᐸᓪᓕᐊᓕᖅᑐᖅ. ᓄᓱᒃᐸᓪᓕᐊᕋᐅᔭᖅᑐᒍ ᐊᒃᑐᓈᖅ, ᑕᓕᖅᐱᖕᒦᑎᒋᐊᖅᑐᖓ ᑐᕌᖅᑎᑦᑐᒍ ᑲᖑᖅ ᐅᕙᓐᓄᑦ. ᓄᓱᑦᓯᐊᕈᓐᓇᓚᐅᓐᖏᓐᓇᒃᑯᑦ ᐋᖅᑭᒋᐊᖅᓯᒪᓚᐅᖅᑐᖓ ᐱᒍᓐᓇᖅᓯᒍᒪᒧᑦ ᑲᖑᖅ. ᓄᓱᒃᑲᒃᑯ ᐊᒃᑐᓈᖅ, ᓄᑦᓱᒃᑐᒍ ᓱᒃᑲᐃᑦᑐᒥᒃ ᐊᒻᒪᓗ ᖁᑦᓯᓗᐊᖅᑕᐃᓕᓪᓗᒍ, ᐊᑦᓯᓗᐊᖅᑕᐃᓕᓪᓗᒍᓗ, ᓄᑦᓱᑐᐃᓐᓇᖅᑐᖓ ᐊᒻᒪᓗ ᑕᐃᒪᓐᓇᐃᒃᑲᒪ ᐊᑲᐅᓐᖏᓕᐅᕈᑎᖃᓚᐅᓐᖏᑦᑐᖅ. ᐅᐃᒐ ᐅᖃᖅᑐᓂ, “ᓇᑭᓪᓕ ᐃᓕᓐᓂᕋᕕᒋᑦ ᑕᒪᒃᑯᐊ? ᐅᕙᓐᓂᒃ ᓴᓇᓚᐅᖅᑕᕋ ᐱᔾᔪᑎᒋᓪᓗᒍ ᑕᑯᔪᓐᓇᕋᕕᒋᑦ ᑭᓱᓕᒫᑦ ᐅᖃᖅᑐᖓ. ᐱᓕᕆᐊᒃᓴᖃᒻᒪᕆᒃᑎᓪᓗᑎᑦ ᐃᒻᒪᖄ ᐃᑲᕐᕋᓪᓗᐊᒥᒃ, ᐅᕙᓐᓄᑦ 5-ᒥᓂᑐᐃᓐᓇᐅᒐᔭᖅᑐᖅ. ᓱᒃᑲᐃᑯᕕᓪᓗᓐᓂᑦ, ᐱᕐᕈᐊᕿᓯᒪᒍᕕᓪᓗᓐᓂᑦ, ᖃᓄᐃᑦᑐᖃᖅᐸᑦ ᓄᖅᑲᖓᑲᐃᓐᓇᕐᓗᓂ ᐃᓱᒪᐃᑦ ᐅᐃᒻᒪᐅᖅᑲᒍᓐᓂᖅᑎᒋᐊᕐᓗᒍ, ᑕᒻᒪᕈᕕᑦ ᓄᓇᑐᐃᓐᓇᕐᒥ, ᓱᑲᔪᒥᒃ ᓴᖅᑭᒍᓐᓇᕐᒪᑦ ᐊᒻᒪᓗ ᑕᒪᓐᓇ ᓴᖅᑭᖁᓇᒍ ᐅᐃᒪᒋᐊᖃᓐᖏᒻᒪᑦ. ᑕᒪᒃᑯᐊᓕᒫᑦ ᐊᑐᓚᐅᖅᑕᒃᑲ, ᐊᐅᓪᓚᖃᑎᒋᒑᖓᒃᑯ ᐅᐃᒐ. ᐊᒻᒪᓗ ᐅᕙᓐᓄᖏᓐᓇᖃᑦᑕᓚᐅᖅᑐᖅ ᐅᖃᐅᓯᖃᕆᐊᖅᑐᖅᑐᓂ ᐃᓱᒪᒋᔭᒥᓂᒃ, ᖃᐅᔨᒪᓕᖅᑐᖓ ᓄᓇᒥᒃ, ᐅᐃᒐ ᐊᖏᕐᕋᑦᓯᐊᖁᓪᓗᒍ. ᖃᐅᔨᓴᖅᓯᒪᖓᒪ ᓯᓚᓕᕆᓂᕐᒥᑦ ᐊᒻᒪᓗ ᐱᖅᓯᕐᓂᕐᒥᑦ, ᑲᑉᐱᐊᓱᖃᑦᑕᒪᐅᖅᓯᒪᔪᖓ ᐱᖅᓯᕐᓂᕐᒥᑦ. ᐅᓗᑲᒻᒪᖃᓗᐊᓕᕋᒪ ᐊᓂᓚᐅᖅᓯᒪᔪᖓ ᐱᖅᓯᖅᑐᐊᓗᖕᒧᑦ ᐊᒻᒪᓗ ᑲᑉᐱᐊᒋᔮᕈᓐᓂᖅᑐᒍ ᐱᖅᓯᕐᓂᖅ. ᐅᒥᐊᖅᑐᓯᓪᓗᖓ ᐃᓄᑑᑦᓯᐊᖅᑐᖓ, ᓱᕋᒍᔾᔨᒍᒪ ᐊᐅᓚᐅᑎᓂᒃ ᖃᓄᐃᓕᐅᕆᐊᒃᓴᖅ ᖃᐅᔨᒪᔪᖓ. ᐊᒃᑐᓈᓕᑐᐃᓐᓇᕐᓗᒍ ᐊᒻᒪᓗ ᑭᓴᐅᑎᒋᓗᒍ, ᐊᒻᒪ ᑖᓐᓇ ᐊᑭᑐᓈᖅ ᓱᕋᒃᑲᓗᐊᖅᐸᑦ ᓇᓪᓕᐅᒃᑯᒫᖃᖅᑐᖓ.