ᖁᕕᐊᓇᑐᐃᓐᓇᖏᑦᑐᖅ, ᑭᓯᐊᓂᑦᑕᐅᖅ ᐃᓕᑉᐸᓪᓕᐊᓇᖅᑐᖅ ᐱᕈᖅᐸᓪᓕᐊᓪᓗᓂ ᐱᖃᑎᒋᓪᓗᒋᑦ ᐃᓐᓇᑐᖃᐃᑦ. ᐃᓐᓇᑐᖃᐃᑦ ᖁᕕᐊᓇᒻᒪᕆᒃᑐᑦ ᐱᖃᑎᒋᓪᓗᒋᑦ, ᐃᓄᑦᓯᐊᕙᐅᓪᓗᑎᒃ ᐱᖃᑎᒋᓪᓗᒋᑦ. ᑕᐃᒫᑦᓴᐃᓐᓇ ᐃᓚᒋᔭᐅᔫᔮᖅᑐᓂ ᖃᑕᓐᖑᑎᖏᓐᓄᑦ, ᖃᖓᒃᑯᑦ ᑕᒡᕙᐅᒍᓐᓂᓛᕐᒥᖕᒪᑕ ᐊᒻᒪᓗ ᑕᒪᓐᓇ ᓴᓇᓐᖑᐊᕐᓂᖅ, ᓴᓇᓐᖑᐊᖅᑎᓅᖓᖕᒪᑦ, ᓯᑎᔪᒻᒪᕆᐊᓗᒻᒪᑕ ᐱᔾᔪᑎᒋᓪᓗᒍ ᑕᑯᒐᒃᑯ, ᑕᒪᓐᓇ ᐅᒃᑯᓯᒃᓴᔭ ᐳᕙᖕᓄᕈᓐᓇᕐᒪᑕ ᐊᒻᒪᓗ ᐅᓗᕆᐊᓇᕐᒪᑦ. ᐊᒻᒪᓗ ᐅᓪᓗᒥ ᐊᑐᖃᑦᑕᓕᖅᑐᑎᒃ ᐊᐅᓚᐅᑎᓕᖕᓂᑦ, ᐅᓗᕆᐊᓇᖅᑐᒻᒪᕇᑦ, ᑐᖁᑦᓯᔪᓐᓇᖅᑐᑦ ᐃᓄᖕᓂᑦ. ᑕᒪᓐᓇ ᐊᑐᕐᓂᐊᕐᓗᒍ ᐅᔾᔨᖅᑐᑦᓯᐊᕆᐊᖃᖅᑐᑎᑦ, ᑎᒍᒥᐊᑦᓯᐊᕐᓗᒍ ᑖᓐᓇ ᐊᐅᓚᐅᑎᓕᒃ. ᑕᒪᓐᓇ ᐋᖅᑭᒃᓯᒪᖁᓪᓗᒍ ᐅᖃᖅᑲᐅᒐᒪ ᓄᑭᖃᕆᐊᖃᖅᑐᑎᑦ ᑕᒪᑐᒧᖓ. ᐱᔾᔪᑎᒋᓪᓗᒍ ᐊᐅᓚᐅᑎᓕᖕᒥᑦ ᑎᒍᒥᐊᕋᕕᑦ ᓱᑲᑦᑐᒻᒪᕆᐊᓗᔪᓐᓇᖅᑐᖅ. ᓄᑭᖃᑦᓯᐊᕆᐊᖃᖅᑐᑎᑦ ᐱᔾᔪᑎᒋᓪᓗᒍ ᓇᑲᑎᕆᒐᕕᑦ ᐅᔭᖅᑲᒥᒃ ᓴᓂᕐᕙᑲᓪᓚᒍᓐᓇᖅᑐᒥᒃ, ᐅᔾᔨᖅᑐᑦᓯᐊᖏᒃᑯᕕᑦ, ᓱᑲᔪᒥᒃ ᖃᓄᐃᓕᐅᕈᓐᓇᕆᐊᖃᖅᑐᖅ ᐃᓱᒪᒃᑯᑦ, ᑕᐅᑐᖕᓂᒃᑯᑦ, ᓅᑦᑕᕐᓂᒃᑯᑦ. ᑕᒪᓐᓇ ᖃᐅᔨᔭᒪᕆᐊᓕᒃ ᖃᓄᖅ ᐊᑐᕐᓂᐊᕐᓗᓂ ᐊᐅᓚᐅᑎᓕᖕᓂᑦ. ᓯᐊᕈᓕ ᐊᑖᑕᒐ ᐊᑐᖃᑦᑕᓚᐅᖅᑐᑦ ᐅᓕᒪᐅᑏᓐᓇᕐᓂᒃ, ᐅᓕᒪᐅᔭᖅᑐᓂ ᓴᓐᖏᔫᒋᐊᖃᖅᑐᖅ ᑕᓕᖅᐱᖕᒧᑦ ᐊᒡᒐᖕᒧᑦ ᑕᖃᓇᖅᑐᐊᓗᒃ. ᑲᒪᒋᑎᖃᑦᑕᓚᐅᕐᒥᖕᒫᖓ ᑳᐱᖅᑕᒥᓂᒃ, ᑳᐱᕆᐊᖅᐸᖏᑦᑐᖅ, ᓄᖅᑲᖓᑎᖔᖃᑦᑕᓚᐅᖅᑖᖓ. ᐱᓕᕆᖃᑎᒋᓪᓗᒍᓗ ᐊᑖᑕᒐ ᓴᓇᓐᖑᐊᕐᓂᒃᑯᑦ ᐊᒻᒪ ᐊᓈᓇᒐ ᑎᑎᖅᑐᒐᕐᓂᒃᑯᑦ, ᑕᐃᒪᓐᓇ ᐱᖃᑎᒋᖃᑦᑕᓚᐅᖅᑖᒃᑲ ᐊᑖᑕᒐ ᐊᒻᒪᓗ ᐊᓈᓇᒐ, ᑕᒪᒃᑮᖕᓄᑦ ᓇᓕᒧᒌᓕᖅᑎᑦᑐᒋᑦ. ᐃᓛᓐᓂᒃᑯᑦ ᐊᔪᖃᑦᑕᓚᐅᖅᑐᖓ ᑭᓯᐊᓂ ᑕᒪᓐᓇ ᐅᖃᐅᓯᕆᓚᐅᖅᓯᒪᓐᖏᑕᕗᑦ ᐱᓕᕆᔾᔪᑎᒋᓂᐊᕆᐊᓴᖅ, ᓴᖅᑭᑐᐃᓐᓇᓚᐅᖅᑐᖅ ᖃᐅᑕᒫᑦ ᐊᑐᒐᐅᓪᓗᓂ. ᑕᒪᒃᑯᐊ ᐃᓱᒪᒋᔭᖏᑦ ᐱᐅᒻᒪᕆᓚᐅᕐᒪᑕ. ᐃᓕᓐᓂᐊᖅᑎᑦᓯᓯᒪᔪᑦ ᐊᖓᔪᖅᑳᑲᓂᒃ, ᐊᑖᑕᒐᓂᒃ, ᐊᓈᓇᒐᓂᒃ, ᐃᓕᔾᔪᑎᒋᓯᒪᔭᖏᑦ ᖁᕕᐊᓇᖅᑐᒥ ᐊᒥᓱᓂᒃ. ᐱᓕᕆᐊᒃᓴᖃᕈᑎᒋᓚᐅᖅᑕᖓᑦ ᐊᒻᒪᓗ ᐱᓕᕆᐊᒃᓴᖃᐃᓐᓇᖅᑐᑎᒃ, ᖃᓄᐃᓕᐅᕈᑕᐅᓯᒪᔪᖅ ᐊᒥᓱᓄᑦ ᐃᓄᖕᓄᑦ ᐱᔾᔪᑎᒋᓪᓗᒍ ᑎᑎᖅᑐᒐᕐᓂᖅ ᐱᐅᔪᒻᒪᕆᐊᓗᖕᒪᑦ. ᐱᐅᓗᐊᕌᓗᓐᖏᒃᑲᓗᐊᕋᒥ ᑕᑯᒥᓇᖅᑐᑦ.